Dako nga bulig para sa mga tricycle drivers and operators ang ginhatag nga P5,000 nga cash assistance sang Department of Social Welfare and Development diri sa syudad sang Iloilo.
Sa interview sang Bombo Radyo kay Jaime Balbino, isa ka tricycle driver kag isa sa mga nakabaton sang cash assistance, iya ginpahayag nga makapiyan-piyan ang amo nga kwarta para sa ila nga pang-gatong amo man sa ila iban nga galastuhon.
Ginpahayag sini nga umpisa nga nagtaas ang presyo sang gatong nabudlayan na sila nga magpangita sang pasahero bangud nga nagtaas man ang presyo sang plete.
Nagapanawagan ini sa gobyerno nga kuntani mapanubuan ang presyo sang gatong bangud nga
kun magapadayon pa ini nga krisis ang mga pigado gid ang tuman nga mabudlayan kag ang makaluluoy.
Nahibaluan nga target sang Department of Social Welfare and Development diri sa syudad sang Iloilo nga matagaan ang 1,983 ka tricycle drivers and operators.
Ginhiwat ang pagtagtaganay sa M.H. Del Pilar Gym sa Jaro, sa Lapaz gym sa Lapaz, Iloilo City kag gym sa Brgy. Zamora-Melliza.
