ILOILO CITY- Ginkasubo sang Philippine Constabulary Association Inc. ang pag-apruba sang ad hoc panel sang House of Representatives sang revised bill on Military and Uniformed Personnel (MUP) Pension System.
Sa interview sang Bombo Radyo kay Major General Van Luspo, retired Philippine Constabulary, iya ginpahayag nga may mga probisyon sa revised bill nga wala nila ginakumpormehan.
Suno kay Luspo, isa diri amo ang probisyon nga nagasiling nga may guaranteed 3% annual increase sa salaries sa sulod sang 10 ka tuig,kag suno sa iya, tuman ini kanubo sa ila ginaduso sadto nga 5% increase.
Pahayag ni Luspo, isa man sa ila ginakadismaya amo ang mandatory nga pagpa-contribute sa mga personnel sang uniformed services kaangay sang Armed Forces of the Philippines, Philippine National Police, Philippine Coast Guard, Bureau of Jail Management and Penology, kag Bureau of Fire Protection sang 5 percent para sa first three years, 7 percent para sa masunod nga three years, kag magasaka ini sa 9 percent para sa mga active personnel.
Matandaan nga amo nga concerns sa Military and Uniformed Personnel pension ang ginhatagan atensyon sang Mayo 2023 paagi kay Finance Secretary Benjamin Diokno nga nagsiling nga ang system nagakinahanglan sang reporma bangud mahimo nga maubusan ini sa sulod sang lima tubtob anom ka tuig.
Ginpahayag naman ni Luspo nga plano nila nga magpatigayon sang rally sa bilog nga pungsod agud ipalab-ot ang ila pagpamalabag sa amo nga revised bill.
