ILOILO – Gin-athag sang Philippine Atmospheric, Geophysical and Astronomical Services Administration nga indi donasyon ang mga equipment nga ila ihatag sa probinsya sang Iloilo nga gamiton sa ipatindog nga Agrometeorology Station sa Iloilo.
Sa interview sang Bombo Radyo kay Maria Fe Villamora, Senior Weather Specialist sang Philippine Atmospheric, Geophysical and Astronomical Services Administration, iya ginpahayag nga magabuligay ang probinsya sang Iloilo kag PAG-ASA sa pagpatindog sang Agrometeorology Station nga may katuyuan nga maghatag sa mga mangunguma tuhoy sa lakat sang tiyempo nga makaapekto sa mga pananom.
Suno kay Villamora, ang probinsya sang Iloilo ang magahatag sang lugar kun sa diin ipahamtang ang nasambit nga establisyemento samtang katungdanan naman nila ang maghatag sang mga equipment nga gamiton.
Santo sa pahayag ni Villamora, na inspeksyon na nila ang mga lugar sa probinsya sang Iloilo nga posible pahamtangan sang nasambit nga establisyemento.
Dugang sang natungdan, ginalauman nga mapatindog na ang Agrometeorology Station sa 2020 bangud wala pa ini nalakip sa pondo subong nga tuig.
