ILOILO CITY – Temporaryo nga ginsuspendi ang visitation priviledge sa mga persons deprived of liberty sa Bureau of Jail Management and Penology (BJMP) Region 6 bangud sa pagsaka sang kaso sang Coronavirus disease 2019 nga kabahin man sang ginpapanaog nga memorandum sang Bureau of Corrections.
Sa interview sang Bombo Radyo kay JSupt. Gilbert Peremne, Deputy Director for Administration sang Bureau of Jail Management and Penology (BJMP) Region 6 iya ginpahayag nga temporaryo nga ginadumilian ang pagbaton sang bisita sang mga preso magluwas lang kun kinahanglanon kag importante bilang kabahin man sang ila preventive measures batok sa nasambit nga virus.
Suno kay Peremne, magluwas sa ginpapanaog nga memorandum sang BUCOR may yara naman sang ginapatigayon nga lihok ang Bureau of Jail Management and Penology (BJMP) Region 6 agud malikaw ang mga preso lakip man ang ila mga himata nga malatnan sang COVID-19.
Dugang sang natungdan, ginpa-iway naman nila ang pagpatigayon sang mga aktibidad kag iban pa nga pagtilipon sa sulod sang BJMP.
Santo sa pahayag ni Peremne, indi pa nila mapat-ud kun tubtob san-o ang pagpatuman sang temporaryo nga suspension sa pagbisita bangud nakadepende man ini sa pinal nga abiso sang National Head quarters kag Department of Health may kaangtanan sa sitwasyon sang COVID-19 sa pungsod.
