CEBU – Indi patas ang pagdakop sa mga raliyista sa University of the Philippines – Cebu kahapon, Hunyo 5 may kaangtanan sa “Black Friday Protest” nga ginpatigayon bilang pagpamatok sa Anti-Terrorism bill.
Ini ang ginapanidugan sang isa sa mga abogado sang gindakop mga mga aktibista.
Sa interview sang Bombo Radyo kay Atty. Rex Fernandez, iya ginpahayag nga indi husto ang ginhimo sang Philippine National Police (PNP) nga basta na lang dakpon ang mga naga-protesta apisar nga yara sa isa ka educational institution.
Una nga ginpahayag sang mga pulis nga wala sang permit ang mga raliyista apang suno kay Atty. Fernandez, kun wala sang permit, wala man sang kinamatarong ang pulis nga magpanakop sang mga miyembro sang grupo kundi ang lider lang ang mahimo arestuhon.
Gintawag man sang natungdan nga iligal ang nangin akto sang mga pulis bangud ang tanan ang may yara sang kinamatarong nga magpakigbahin sa hublag-protesta.
Nahibaluan nga una na nga ginkumpirma sang Cebu City Police Office nga mga miyembro sang local progressive organizations sa Cebu ang pito ka mga kabataan nga gindakop.
#
