ILOILO – Katungdanan sang mga alkalde nga pamatbatan ang mga punong barangay nga wala nagatuman sa pagpanghawan sa ila mga lugar nga madugay na nga mandu sang Department of Interior and Local Government.
Ini man matapos nga naghatag sang 75 ka adlaw nga plaso ang Department of Interior and Local Government agud matuman sang mga Barangay officials ang ila mga katungdanan may kaangtanan sa pagpanghawan.
Sa interview sang Bombo Radyo kay Teodora Sumagaysay, direktor sang Department of the Interior and Local Government sa probinsya sang Iloilo iya ginpahayag nga klaro nga nakasaad sa memorandum nga ila ginpapanaog nga nagakadapat nga mapang-ubos na kuha ang tanan nga sablag sa dalan agud indi mapasakaan sang nagaka igo nga kaso ang mga opisyal sang barangay.
Suno kay Sumagaysay, sa tion nga indi pa matuman sang mga barangay officials ang mandu sang DILG katungdanan na sang mga Municipal Mayors nga hatagan sila sang silot.
Dugang sang natungdan, patigayunon ang una nga reporting may kaangtanan sa Oplan Hawan sa Marso 2 samtang patigayunon naman ang validation matapos ang ginhatag nila nga 75 ka adlaw nga plaso.
