Ginaduso ni House Deputy Speaker Mikee Romero sa gobyerno nga dal-on sa prayoridad sa COVID-19 vaccination program ang mga atleta nga Pinoy nga magapasakop sa Tokyo Olympics kag 2021 Southeast Asian Games sa Hanoi, Vietnam.
Paagi sa House Resolution No. 1507, nagpanawagan si Romero sa Inter-Agency Task Force for the Management of Emerging Infectious Diseases kag sa iban pa nga ahensya sang gobyerno nga kabigon bilang “frontliners” ang mga atleta agud nga madala sila sa una nga mabakunahan batok sa COVID-19.
Matandaan nga una na nagpahayag si vaccine czar Carlito Galvez Jr. nga 50 million tubton 70 million ka tawo ang target nga mabakunahan sa sulod sang isa ka tuig kag magaumpisa ang vaccination sa Pebrero 20.
Suno naman kay Romero, mapaidalom na ang national athletes sa qualifying stages sang Tokyo Olympics kag SEA Games sa Abril kag Mayo 2021.
Importante suno sa natungdan nga temprano pa sila nga mabakunahan agud makapasakop sila sa qualifying stages.
