ILOILO CITY– Ginatinguhaan sang Iloilo City Government nga buksan ang syudad para sa travelers halin sa nanuhay-tuhay nga bahin sang Pilipinas apang hugot sa gihapon ang travel protocols agud indi magtimbuok ang kaso sang COVID-19.
Ini ang pagpaathag ni Iloilo City Mayor Jerry Treñas sa iya gin-isyu nga Executive Order No. 18-A nga amo ang naga-amyendar sa EO No.18 kag amo ang “guidelines on the management of persons traveling to Iloilo City”.
Ini ang ginpatuman na umpisa subong nga adlaw, Marso 8.
“While we want to open up our economy and while we want to open Iloilo for visitors coming from different parts of the country, nakita naton nga ang mga ospital sa Manila gakapuno naman sang mga COVID-19 patients. We do not want to have that problem. That is why may gindugang kita sa aton nga protocol,” pagpaathag sang alkalde.
Nahibaluan nga sa Metro Manila, ginkumpirma sang otoridad nga may yara na sang family clustering sang infections.
Ang ‘family clustering’ ang nagakahulugan nga may mga pasyente nga halin sa isa ka pamilya kag may yara pa sang mga kaso involving sa mga kabataan.
Ginpahayag man sang OCTA group of researchers nga ang daily cases sa Metro Manila ang nagsaka sa 42 percent halin sang nagligad nga semana.
“We really have to protect Iloilo. Ang aton nga health facilities indi man gid madamo nga maka-cover sa tanan nga naga-positive halin sa Panay amo na nga proteksyunan ta anay ang tanan nga naga-abot diri,” dugang pa ni Treñas.
KAUNDAN SANG EO NO 18-A
Sa amended guidelines, ang Authorized Persons Outside of Residence ukon APOR nga magatinir sa Iloilo City sa sulod sang isa ka adlaw ukon mas manubo pa nga inoras ang kinahanglan magkuha sang notice of coordination and acceptance paagi sa Iloilo City Emergency Operations Center (IC-EOC) antes ang scheduled nga pag-abot.
Kun nagabyahe naman para sa medical purposes ang APOR, kinahanglan nga ipresentar ang certification halin sa qualified healthcare provider.
Para naman sa APOR nga magatinir sa Iloilo City sang masobra isa ka adlaw, locally stranded individuals (LSIs), returning overseas Filipinos (ROFs), kag tanan nga non-essential travelers, yari ang mga kinahanglanon:
- notice of coordination and acceptance halin sa IC-EOC kun sa diin pwede ma-indicate ang choice
- pwede nga magpresentar sang negative RT-PCR test result nga nakuha 72 hours antes ang date of travel
- mag-pa swab test sa mismo adlaw sang pag-abot
- ukon mag-obserbar sang 14-day quarantine
Ang traveler ukon LSI ukon APOR nga may yara sang negative RT-PCR test result nga mapresentar sa iya pag-abot ang pwede na maka-proceed sa itinerary pagkatapak sa syudad.
Kun pilion sang traveler ukon LSI ukon APOR ang 14-day quarantine ukon swab test sa iya pag-abot, pwede siya makatinir sa designated quarantine facilities sang LGU ukon pwede man ang home quarantine.
