ILOILO CITY – Nag-angkon sang nagkalain-lain nga reaksyon ang panugyan ni Police Brigadier Gen. Ignatius Dacoco Ferro, Regional Director sang Police Regional Office 7 nga pabuligon ang mga tsismosa sa Coronavirus disease 2019 (COVID-19) contact tracing.
Sa interview sang Bombo Radyo kay Iloilo Gov. Arthur Defensor Jr., iya ginpahayag nga palaligban pa kun sino ang appointing authority sang mga tsismosa.
Suno kay Defensor, sa contact tracing, may yara sang ginasunod nga guidelines sa diin maathag nga ang mga nagakadapat nga magpatigayon sang contact tracing amo ang Department of Interior and Local Government, Philippine National Police kag Department of Health.
Suno naman kay Iloilo City Mayor Jerry Treñas, ang problema sa COVID-19 ang seryoso.
Sa interview sang Bombo Radyo kay Treñas, iya ginpahayag nga indi dapat mag joke ukon himuon nga karadlawan ang pandemya.
Ginpahayag sang alkalde nga posible nagapinsar lang si Police Brigadier Gen. Ferro nga butangan man sang gamay nga humor ang ginapangatubang nga problema sa COVID-19.
Samtang nagapati naman ang Liga ng mga Barangay sa Syudad sang Iloilo nga may dako nga mabulig ang mga tsismosa sa COVID-19 contact tracing.
Sa interview sang Bombo Radyo kay Punong Barangay Roberto Niño, tagpamaba sang Liga ng mga Barangay sa Syudad sang Iloilo, iya ginpahayag nga apisar makabulig ang mga tsismosa, apang nagakadapat nga ini ang ipaidalom sa maid-id nga validation ang mga impormasyon nga ila ihatag
Suno kay Niño, nagakahangawa ang mga punong barangay kag iban pa nga law enforcers nga posible mabudlayan pa sila nga i-validate ang mga impormasyon nga ipalab-ot sang mga tsismosa.
Suno kay Niño, mas maayo nga sundon na lang ang panugyan ni National Task Force COVID-19 Contact Tracing Czar kag Baguio City Mayor Benjamin Magalong nga pangunana sang Barangay Health Emergency Response Team ang COVID-19 contact tracing.
