Pabaskugon pa nanday United States President Joe Biden kag Vice President Kamala Harris ang pagduso sang kinamatarong sang mga tawo sa abortion paagi sa serye sang ila nga mga events subong nga semana nga amo man ang ginakabig pangontra sa kampanya ni anay President Donald Trump.
Si Harris amo ang gina-promote sang Biden campaign nga amo ang nawong sang reproductive rights issue nga amo ang nagadala sang mensahe nga pananglitan magbalik sa puwesto ang Republican former president nga si Trump, magapatuman ini sang istrikto nga mga tikang agud balabagan ang abortion.
Kadungan sang ika-51 nga anibersaryo sang maragtason nga Roe v. Wade court decision nga amo ang naga-legalize sang abortion, nagbyahe man si Harris sa swing state sang Wisconsin agud ilunsar ang nationwide tour sa amo nga kontrobersyal nga isyu.
Matandaan nga sang 2022, may panibag-o nga landmark ruling ang Korte Suprema sa Estados Unidos sang Amerika nga nagabaliskad sa amo nga desisyon — isa ka desisyon nga gintawag ni Biden nga “tragic error” sa bahin sang mga Republicans.
Subong naman nga bulan, nagapakigsapol si Biden sa mga eksperto sa reproductive healthcare sa White House.
Subong man nga adlaw natalana nga nga magpatigayon sanday Harris kag Biden sang ila labing-una nga joint appearance sa 2024 campaign. Matabo ini sa Virginia kaupod kay First Lady Jill Biden kag “Second Gentleman” Douglas Emhoff nga amo ang bana ni Harris.#
(Photo by Drew Angerer/Getty Images via CNN)
