Gindala sa ikaduha nga adlaw sang confirmation hearing sa International Criminal Court (ICC) ang kaso sang 17-anyos nga solterito nga si Kian Delos Santos nga ginpatay sa kasagsagan sang Duterte drug war.
Ginpatay si Kian sang Agusto 16, 2017 sa Caloocan City.
Ang amo nga insidente nagresulta sa lapnagon nga pagpakamalaot sa administrasyon rason nga temporaryo pa nga ginpauntat ang mga pulis sa drug operations.
Ginhalimbawa sang prosekusyon ang kaso ni Kian para sa third count sang kaso ni Duterte nga crimes against humanity. Nakatutok ini sa kontrobersyal nga “Project Tokhang”.
Kaangay sa iban nga modus operandi nga ginagamit sa iban nga biktima sang barangay clearance operations, gin-identify sila paagi sa “listahan” kag ginpatay sa police operations.
Sa amo nga scheme, ginatanuman ang crime scene sang mga ebidensya kaangay sang armas, droga, ukon kwarta, kag ginapeke ang police reports agud mahambal nga lehitimo ang operasyon kag nagdepensa lamang ang mga pulis.
“In this context, as witnesses explained, the police often used the term ‘nanlaban’ which translates to fighting back to describe incidents in which they supposedly shot a victim in self-defense,” suno sa prosekusyon.
“These reports were often almost identical, in essence, copy-paste reports in which victims were frequently blamed for their own death, and finally, unofficial rewards were paid,” dugang niya.
Ini nga padya nagadiretso sa mga pulis nga amo ang nagpatay sa target.
Three counts sang crimes against humanity ang ginapangatubang ni Duterte sa ICC kun sa diin may ginplastar nga 76 ka mga kaso sang pagpatay halin sang 2013-2018. Ini nga record suno sa prosekusyon ang porsyon pa gid lamang ukon “mere fraction” sang linibo nga nagkalamatay sa “war on drugs” campaign sang mayor pa si Duterte tubtub nga na-eleher na bilang presidente.#
