Ginpabakod pa sang Appeals Chamber sang International Criminal Court (ICC) ang nauna nga desisyon sang Pre-Trial Chamber I nga nagasiling nga MAY HURISDIKSYON ang international tribunal sa kaso ni former president Rodrigo Duterte nga crimes against humanity.
Lunsay ginbasura ang apat tanan ka grounds nga ginduso sang kampo ni Duterte nga nagatuyo kuntani nga i-nullify ang hurisdiksyon sang korte sa kaso kag pauntaton ang imbestigasyon sa drug war.
“The appeals chamber by majority… has rejected all four grounds of appeal. Having rejected the entire appeal, the appeals chamber considers that the defense’s request for unconditional release of Mr. Duterte is moot,” suno sa ruling sang Chamber.
Ginbasa ang ruling sa ICC headquarters sa The Hague subong nga hapon kun sa diin ang nag-preside amo si Judge Luz del Carmen Ibáñez Carranza.
Sa ruling, ginsiling nga may hurisdiksyon ang ICC bangud nag-umpisa ang preliminary examination sang Office of the Prosecutor sa war on drugs sang Pebrero 8, 2018 nga masobra isa ka tuig ANTES nag-withdraw ang Pilipinas sa ICC.
Ang iban nga myembro sang Appeals Chamber amo sanday Judge Tomoko Akane, Judge Solomy Balungi Bossa, Judge Gocha Lordkipanidze, kag Judge Erdenebalsuren Damdin.
Ini nga ruling nagakahulugan nga MAGAPADAYON ang proceedings sa kaso ni Duterte lakip na ang ginabantayan nga desisyon sang Pre-Trial Chamber (PTC) I.
Sa amo nga desisyon sang PTC I mahibaluan kun ikumpirma ang charges batok kay Duterte. Kun ma-confirm, ipasaka ini sa Trial Chamber.
Wala nagtambong si Duterte sa hearing subong nga adlaw matapos nga gin-request sini nga i-waive ang iya appearance. Ang nagtiglawas sa iya amo ang iya mga abogado nga sanday Nicholas Kaufman, Dov Jacobs, kag iban pa.
Nahibaluan nga ginkasuhan si Duterte sang three counts of murder bilang “indirect co-perpetrator” sa mga pagpamatay nga ginhimo kadungan sang drug war.#
