PASSI CITY, ILOILO – Apisar duha ka beses nga ginpaidalom sa enhanced community quarantine ukon ECQ nga amo ang pinakahugot nga quarantine classification bangud sang pagtimbuok sang COVID-19 cases, amat-amat na nga ‘nagabangon ang syudad sang Passi gikan sa pandemya’ kag amat-amat man nga nagakapapas ang virus.
Sa interview sang Bombo Radyo kay Passi City Mayor Atty. Stephen Palmares, iya ginpahayag nga halin sa 305 nga COVID-19 cases sang Pebrero subong nga tuig, nagnubo na subong sa 22 ang active cases sang COVID-19 sa amo nga component City.
Kun madumduman, ang una nga ECQ ang ginpatuman sang Marso 2020 kaupod sa bug-os nga syudad kag probinsya sang Iloilo.
Ang ikaduha nga ECQ ang ginpatuman sa Passi City sang Enero 28,2021 kag naglawig tubtob sang Pebrero 11, 2021 bangud sang tuman ka taas nga COVID-19 cases nga narekord sa sulod sang Passi City public market kag sa natabo nga community transmission.
Matapos ang ginpatuman nga containment measures kag sulit-sulit nga pahanumdom sa mga tawo sa syudad, ginpahayag ni Palmares nga natapna ang COVID-19 surge, nagbalik ang negosyo sa public market, kag naghalog ang restrictions.
Sa subong, napaidalom ang syudad sa modified general community quarantine(MGCQ).
Apisar sini tanan, nagapanawagan ang alkalde sa publiko nga indi gid magkumpiyansa kag padayon gid nga sundon ang simple nga mga mandu kaangay sang pagdistansya, pagsuksok sang face mask, kag regular nga paghugas sang kamot.
