ILOILO CITY – Liwat nga nagpanawagan si Iloilo City Mayor Jerry Treñas sa Department of Health kag Inter-Agency Task Force nga hatagan sang atensyon ang problema sa Western Visayas Medical Center.
Ini matapos ang ginapahayag pag-leave sang hospital administrator sang nasambit nga hospital kag wala na subong sang Office-in-Charge nga amo ang makadesisyon.
Sa interview sang Bombo Radyo kay Treñas, iya ginpahayag nga sa baylo nga maka-akomodar sang 200 ka pasyente nga may yara sang Coronavirus Disease 2019 (COVID-19), nagalab-ot gid lamang sa 20 ang naadmit sa nasambit nga hospital.
Suno kay Treñas, kalabanan sa mga pasyente ang ginatugyan na lang sa West Visayas State University Medical Center bangud daw kasubong nga wala na nagabaton ang Western Visayas Medical Center nga amo ang COVID-19 hospital sa Western Visayas.
Magluwas diri suno sa alkalde, kasubong nga nagatinudlu-anay na lang kun sa diin nga hospital dapat dal-on ang COVID-19 patient.
Bangud sini, nagakadapat nga magpatunga ang Department of Health kag ang Regional Level sang Inter-Agency Task Force agud masolbar ang nasambit nga problema bangud dako ang mangin epekto sini ilabi na sa mga pasyente.
May kaangtanan naman sa plano nga pagpatigayon sang mass testing sa Western Visayas, ginaduso ni Mayor Jerry Treñas ang pag-accredit sa laboratories sang Univesity of San Agustin kag West Visayas State Univesity.
Posible suno sa alkalde nga mangin madamo ang ma-akomodar para sa test kag mapadasig ang pagpaguwa sang resulta.
Samtang, nagpasalamat naman ang akalde sa padayon nga pagbubo sang bulig para sa frontliners lakip man sa mga apektado nga pumuluyo.
