ILOILO CITY – Dismayado ang isa ka pamilya sa Pototan, Iloilo matapos nga gin-cremate ang bangkay sang ila himata nga ginadudahan nga nagpositibo sa Coronavirus Disease 2019 (COVID-19) nga wala sang pahanugot.
Sa interview sang Bombo Radyo kay alyas Veronnica, iya ginpahayag nga una nga naadmit ang iya apo sa Iloilo Provincial Hospital sa Pototan matapos nakabatyag sang pagsakit sang tiyan.
Suno kay Veronnica, na-diagnose ang iya apo nga may appendicitis kag gindala sa Western Visayas Medical Center agud operahan.
Ginpahayag ni Veronnica nga matapos ang operasyon, nag-angkon sang Pneumonia ang iya apo kag gindudahan nga may COVID-19.
Wala sila ginpahibalo sang mga doktor tuhoy sa sitwasyon sang ila himata kag nakibot na lang sila sang gin-cremate na ang bangkay matapos ginbawi-an sang kabuhi ang pasyente.
Sa pagpaathag sang pamunuan sang Western Visayas Medical Center, kun basehan man ang ginpaggwa nga mandu sang Department of Health, nagadakapat nga i-cremate ang bangkay sang COVID-19 patient, Persons Under Monitoring ukon Persons Under Investigation.
Ginkabig na nga Person Under Monitoring ang pasyente matapos nakitaan sang simtomas sang COVID-19 paagi sa Pneumonia rason nga dapat gid nga i-cremate ang bangkay.
Nagapanindugan naman ang pamilya nga indi COVID-19 positive ang ila himata kag ginahulat na lang nga matapos ang pagpatuman sang Expanded Enhanced Community Quarantine agud nga makuha ang abo sang pasyente.
