ILOILO CITY- Wala nagakadulaan sang paglaum ang pamilya sang Ilongga nga isa sa mga missing nga Overseas Filipino Worker sa nagapadayon nga Israel- Hamas war nga makit-an ini nga yara sa maayo nga kahimtangan.
Sa interview sang Bombo Radyo kay Paterna Prodigo sang Burak, Maasin, Iloilo nga iloy sang missing nga si Mary Grace Prodigo Cabrera nga nagatrabahi sa Kibbutz Be’eri, Israel, iya ginpahayag nga nagapati sila nga nagapanago lang ang iya anak kag ma-rescue ini sang mga otoridad.
Suno kay Prodigo,sa subong, pangamuyo kag pagsalig sa Ginuo ang ila salandigan sa tunga sang pagkabalaka nila sa ila himata.
Nahibaluan nga magluwas kay Grace, nagatrabaho man sa Kibbutz Be’eri ang iya utod nga si Mary June Prodigo apang na-rescue na ini sang otoridad.
Nakapakig- angot na si Mary June sa iya pamilya sa Maasin kag ginpasiguro nga yara ini sa maayo nga kahimtangan matapos na-rescue sila sang otoridad kag gindala sa bomb shelter.
