ILOILO CITY- Ka-bombo, halimbawa kun indi mo gusto ang pakaslan sang imo bata ukon sang imo utod ukon sang bisan sin-o man nga paryente mo, mahimo ka man sang pamaagi agud indi madayon ang ila kasal?
Baw, may ara ako pamilya nga nakilala nga ginhimo ang tanan agud lamang nga indi magdayunay ang ila himata kag ang iya nobya.
Didto ini sa Ciudad Obregón, Sonora Province, sa Mexico.
Ang pamilya nga ini, tag-iya sang sikat nga punerarya sa Mexico.
Sang ginpakilala sang lalaki ang iya nobya, wala na dayon nila ini nagustuhan bangud pigado ini kag gindumdom nila nga basi kwarta lang ang lagas sang nobya sa lalaki.
Nakahibalo ka kun ano ginhimo nila?
Ginpahog sang mga utod sang lalaki ang nobya sini nga si Alexandra, paagi sa social media, gamit ang fake accounts.
Wala pa nakontento, nagpakuno- kuno pa ang iloy nga gin-heart attack siya kag ginbasol ang nobya.
Sang adlaw na sang kasal, abaw, hamakon mo na ya nga nagbayad pa sila sang mga sunoy agud bubuan sang pinta ang trahe de boda sang babaye samtang ara sa gwa sang simbahan.
Sa pagkamatuod, sang adlaw sang kasal, wala gid nagtambong ang pamilya sang lalaki.
Ang pamangkot… nadayon ang kasal?
Ang sabat…siempre kay palangga gid sang lalaki ang babaye.
Hambal sang iban nga nakahibalo sang natabo… mas maayo nalang nga mag-istar sila nga mag-asawa sa malayo nga lugar agud nga indi na sila madistorbo sang pamilya sang lalaki.
