Makatalandog-balatyagon ang panawagan sang isa ka Lola nga naggamit sang pangalan sang Argentine football superstar nga si Lionel Messi agud nga makaluwas sa isa ka daku nga katalagman.
Istorya ini sang 90-anyos nga si Ester Cunio nga nagapuyo didto sa Israeli Kibbutz nga Nir Oz.
Sang Oktubre 7, 2023 ukon ang adlaw nga nag-atake ang Hamas sa southern Israel kag nagpangdala sang mga bihag, isa ang balay ni Ester sa mga ginsulod sang armado nga kalalakinhan.
Sang amo nga adlaw, ginpamangkot ang Lola kun sa diin ang iban nga myembro sang iya pamilya apang indi ini makasabat sang maayo sa Hebrew ukon mangin sa English.
Ginsilingan sini ang lalaki nga ang ginagamit gid sini nga lengguwahe amo ang Argentinian-Spanish bangud tumandok siya sang Argentina kag tigulang na sang nagsaylo sa Israel.
Daw nagapanginit na ang lalaki, agresibo, kag nagpamangkot sa Lola kun ano ina ang Argentinian!
Nagsabat si Lola: “Nagalantaw ka bala sang football?” Sang nagtango ang lalaki, nagsiling si Lola: “Didto ako halin sa lugar ni Messi!”
Nakibot ang tawo kag naglain ang trato sini sa Lola kag ginsiling pa sini nga idol sini ang amo nga footballer gani iya gin-agbayan ang tigulang, ginpa-uyatan ang iya nga AKA47 gun, nag-peace sign, kag nagpa-picture pa.
Nakaluwas ang Lola apang ang masakit nga bahin sang istorya sang Lola amo ang panawagan sini kay Messi.
Pahayag sini, kun malantaw sang football star ang iya istorya, kuntani manawagan ini nga mahilway na sang Hamas ang mga hostages. Didto nalakip sa mga bihag ang iya duha ka apo nga sanday David kag Ariel nga nalakip sa gin-abduct sang Hamas militants sang amo nga adlaw sang 2023.
Ginahulat pa ang mangin sabat sang world champion sa sini nga panawagan sang tigulang ilabi na bangud ginsuportahan man sini anay ang 2014 match nga gin-organisar ni Pope Francis agud nga matib-ong ang kalinong sa tunga sang Israelis kag Palestinians.#
