Gina-uyatan ni Camilo Osias ang record bilang Senate President nga may pinaka-malip-ot nga termino bilang lider sang Senado sa bilog nga maragtas sang Pilipinas.
Naglawig lamang ini sang 13 ka adlaw. Nagpungko siya sang April 17 kag naglawig tubtub sang Abril 30, 1952.
Si Osias ang nabun-ag sang 1889 sa Balaoan, La Union kag isa ka manunudlo, manunulat, antes ini nangin mataas nga opisyal sang gobyerno.
May nagagwa nga mga huring-huring nga may panibag-o nga kudeta nga himuon sa pag-resume sang sesyon sang Senado karon sa hapon.
Mismo si newly-installed Senate President Alan Peter Cayetano ang nagpalutaw sang impormasyon nga naga-istorya ang minority bloc sa majority bloc agud nga mapatigayon ang kudeta — isa ka semana lang matapos nga ginbuslan ni Cayetano si former Senate leader Vicente Sotto III paagi sa 13-9-2 nga boto.
Kun matabo ang kudeta, maagaw ni Cayetano ang record bilang shortest-serving Senate President nga naglawig lamang sang isa ka semana.
Una na sini ginpahayag nga kun indi kuntento ang kaupdanan sini sa iya liderato, may iban pa man nga mahimo pilian.
“My whole life people doubted me, but God does not doubt me,” suno kay Cayetano sang nagligad nga semana. “So I’ll do my best, if my best is good enough for everyone, thank you. If not, there are 23 other senators to choose from.”
Ang panibag-o nga kudeta ang kasunod sang mataas nga tension sa upper chamber sa sulod sang isa ka semana. May nagaguluwa nga impormasyon nga gin-islan ang liderato sang Lunes bilang preparasyon sa impeachment trial batok kay Vice President Sara Duterte. Mga kaalyado sini ang yara subong sa majority bloc sa idalom ni Cayetano.
Sang Myerkules sang gab-i naman, may tiniruhay nga natabo sa sulod sang upper chamber kaangot naman sa ICC arrest warrant batok kay Senator Ronald “Bato” Dela Rosa.#
