Naghingyo si anay House Speaker kag subong Davao del Norte 1st District Rep. Pantaleon Alvarez sa militar nga bawion ang ila nga suporta para kay President Ferdinand Marcos, Jr. agud nga mapilitan ini nga magpanaog sa pwesto.
Ginhimo ni Alvarez ini nga apelar sa Armed Forces of the Philippines (AFP) kadungan sang rally sang die-hard supporters ni anay President Rodrigo Duterte sa Tagum City kagab-i, Abril 14.
Ginpahanumdom ni Alvarez sa militar ang ila nga constitutional duty nga protektahan ang mga pumuluyo kag ang estado kag indi amo nga proteksyunan ang presidente.
Kaangot ini sa nagasaka nga tensyon sa tunga sang Pilipinas kag China sa West Philippine Sea kun sa diin una na nagpahayag si Duterte nga indi luyag sang China nga magpahilabot ang Pilipinas sa amo nga teritoryo kag indi man luyag nga kay-uhon ang BRP Sierra Madre sa Ayungin Shoal.
Pahayag ni Alvarez, dapat nga indi na maghulat ang Pilipinas sa gyera bangud magadala ini sang daku nga halit kag kagutom.
Sa amo man nga rally, may personal nga pagpang-atake si Alvarez kun sa diin gintawag sini nga “mangu” ang presidente.
Ini nga rally ang natabo samtang matunog nga gina-istoryahan ang gina-alegar nga “gentleman’s agreement” sa tunga ni Duterte kag China kaangot sa West Philippine Sea — bagay nga ginakwestyon naman ni Marcos bangud daw kaangay nga ginkompromiso ang soberanya kag teritoryo sang Pilipinas.
