Nag-abante na si Carlo Paalam sa quarterfinals sang men’s 57kg boxing event sa Paris Olympics 2024 matapos ginlutos ang Irish fighter nga si Jude Gallagher sa Round of 16 sa North Paris Arena 9:30 subong nga gab-i, Hulyo 31 (oras sa Pilipinas).
Nangin unanimous ang desisyon ang judges pabor sa 26-anyos nga Tokyo silver medalist.
Pananglitan magdaog si Paalam sa masunod nga round, sigurado na ini nga makaangkon sang bronze medal kag buhi man ang paglaum nga mapatasan sini ang iya nalab-ot sa Olympics sa Japan sang 2021 ukon mabulsa ang maila nga gold medal para sa Pilipinas.
Ang kadalag-an sini amo ang naghatag paglaum sa Philippine boxing team ilabi na kasunod sang makakilibot nga kalutusan nga naangkon sang Tokyo bronze medalist nga si Eumir Marcial kaina sang kaagahon kun sa diin ginpierde ini ni Turabek Khabibullaev sang Uzbekistan sa Round of 16 sang men’s 80kg division nga amo man ang nagtapos sang kampanya sini sa 2024 Summer Games.
Sini lang nga gab-i, nalutos man ang isa pa ka Pinoy boxer kag Olympic debutant nga si Hergie Bacyadan sa kamot sang top seed nga si Li Qian sang China sa women’s 75-kg. boxing event.
Magluwas sa division ni Paalam, may tyansa man ang Pilipinas para sa medal round sa boxing paagi kanday Aira Villegas kag Nesthy Petecio.
(Photo: Carlo Paalam/FB)
