Nagsulat ang mga abogado ni Leyte 1st District Representative Martin Romualdez kay Ombudsman Jesus Crispin “Boying” Remulla agud hingyuon ini kag ang iya bilog nga opisina nga mag-inhibit sa imbestigasyon kaangot sa anay House Speaker.
Sa sulat nga nasapubliko subong nga adlaw, ginpahayag sang kampo ni Romualdez nga ang public statements nanday Remulla kag Assistant Ombudsman Mico Clavano ang nagapakita nga nahusgaran na nga daan nila si Romualdez nga isa sa mga naangot sa flood control corruption scandal.
Partikular nga namunuan ang pahayag ni Remulla sang Nobyembre sang nagligad nga tuig nga nagapaathag kaangot sa posibilidad sang pagpasaka sang kaso nga plunder batok kay Romualdez
Sang nagligad nga semana, gintawag naman ni Clavano si Romualdez nga “master plunderer”.
Suno sa kampo ni Romualdez, daw kaangay nga gintumod na nga daan sang Ombudsman nga guilty si Romualdez sa plunder antes pa man na-file ang kaso kag samtang nga padayon pa lamang ang imbestigasyon.
“The Honorable Office has already determined that our client is guilty of plunder even before any case has been filed and while it is still performing investigatory duties,” suno sa sulat.“They unmistakably demonstrate prejudgment and, in the minds of reasonable observers, render Rep. Romualdez’s participation in the flood-control anomalies a foregone conclusion,” dugang sini.
Ang ila request para sa inhibition suno sa mga abogado amo ang magapasiguro nga maproteksyunan ang kinamatarong ni Romualdez sa due process.
Naghingyo man ang mga abogado nga kun may kaso batok sa ila kliyente, i-refer ini sa independent and impartial body ukon officer nga maka-conduct sang proceedings nga hilway sa anuman nga bias ukon prejudgment.
“To ensure that our client’s right to due process is adequately protected, we are constrained to respectfully request that the honorable office inhibit itself from conducting the preliminary investigation of any complaint that may be filed against Representative Romualdez,” dugang sa sulat.
Nahibaluan nga nagaplano kuntani si Romualdez nga magkadto sa Singapore para sa medical procedure matapos nga nakakuha na ini sang travel clearance halin sa Kamara.
Kasunod sini, nag-request ang Ombudsman sa Sandiganbayan nga dagdagan si Romualdez sang preventive hold departure order agud nga indi ini makabiya sa Pilipinas.#
