Malapit na sa 100 ang patay sa ikatatlo nga adlaw sang ginamo kag pagsinigabong sa Khartoum nga kapital nga syudad sang Sudan.
97 ang nakumpirma nga nagtaliwan samtang ginpahayag naman sang World Health Organization nga nagakawad-an na sang critical supplies ang mga ospital agud nga mabulong ang mga pilason.
Suno sa doctors’ union sa amo nga pungsod, ginatos ka mga sibilyan ang nagkalapilasan bangud sa amo nga away.
Pareho naman nga ginbasura sang rival government factions ang panawagan sang iban nga pungsod lakip na sang Amerika nga magpatuman sang ceasefire.
Sabado sang aga sang nagsugod ang amo nga patyanay kasunod sang sinemana na nga tensyon sa tunga ni army chief Abdel Fattah al-Burhan kag sang deputy nga si Mohamed Hamdan Daglo, commander sang daku kag armado nga grupo nga paramilitary Rapid Support Forces.
Una naman nga gin-abisuhan sang embahada sang Pilipinas sa Egypt ang mga Pinoy sa Sudan nga magpabilin anay sa sulod sang balay sa tunga sang nagakatabo nga kinagamo kag away sa Khartoum nga ginpangunahan sang rival generals nga amo ang nakaangkon sang gahum sang 2021 coup.
