ILOILO CITY- Nakulangan si Pavia, Iloilo Sangguniang Bayan Member Pyt Trimañez sa dalagan sang pinakauna nga pagpatigayon sang legislative inquiry sa kamara nahanungod sa kontrobersyal nga Ungka kag Aganan flyovers.
Sa interview sang Bombo Radyo kay Sangguniang Bayan Member Trimañez nga amo man ang chairman sang Committee on Transportation sa konseho sang banwa, iya ginpahayag nga ang tanan nga ginpresentar ni Department of Public Works and Highways Region 6 Assistant Regional Director Engr. Jose Al Fruto ang madugay naman nga nahibaluan sang publiko.
Suno kay Trimañez, ang ila ginalauman amo nga makaplastar ang ahensya sang masunod nga tikang samtang ginahulat ang mangin pinal nga nga desisyon sang Central Office sang Department of Public Works and Highways nga ipatuman nga intervention sa pag-rehabilitate sang flyover.
Pahayag sang konsehal, kuntani may yara sang safety measures nga himuon ang nasambit nga ahensya agud nga mapahamtang man ang mga tawo nga nabalaka sa ila seguridad sa tion nga maglabay sa idalom sang flyover.
Gin-ako naman sang opisyal nga nakibot siya kun ngaa daw halos wala nakasabat sa mga pamangkot sa nasambit nga inquiry kahapon si Asst. Regional Director Fruto.
Matandaan nga sang ginpamangkot si Fruto kahapon ni KABATAAN party-list Rep. Raoul Manuel kun ngaa wala sang kopya ang ila opisina sang final report sang Abinales Associates Engineers + Consultants sa problema sa Ungka Flyover,wala ini nakasabat.
Samtang, ginaabi-abi naman sang natungdan ang ginduso ni Rep. Manuel nga sa Iloilo hiwaton ang ikaduha nga hugnat sang inquiry.
