Natalana nga mag-atubangay ang TNT Tropang Giga kag ang Barangay Ginebra San Miguel sa championship round sang PBA Season 49 Commissioner’s Cup.
Ini ang ikaduha nga sunod-sunod nga conference nga magasambuwa ang duha ka teams nga ginapangunahan nanday Coach Chot Reyes sa TNT kag Coach Tim Cone sa Ginebra.
Kagab-i sang ginlutos sang Gin Kings ang top seed nga NorthPort, 126-99, nga amo ang nagtakop sa ila nga best-of-seven semifinals sa lima gid lamang ka hampang sa Araneta Coliseum.
Nanguna sa kadalag-an sang team ang import nga si Justin Brownlee kag si Jamie Malonzo.
Naka-11 pts man si Troy Rosario apang nakaangkon sang right ankle injury sa third quarter kag wala na nakabalik.
Ini na ang 32nd overall finals appearance sang Ginebra kag pang-40 nga entry ni Cone sa title bout.
Ginatawag sang kadam-an ang championship round nga royal rematch nga kun sa diin magataksanday sanday Cone kag Reyes kag ang imports nga sanday Rondae Hollis-Jefferson kag Brownlee.
