ILOILO CITY- Natalana nga magbiya padulong sa Estados Unidos subong nga adlaw si Presidente Ferdinand Marcos Jr. agud magtambong sa inaugural summit sa tunga sang United States, Japan, kag Pilipinas sa Washington DC.
Ini nga landmark event ang kasunod sang mga tensyon nga padayon nga nagasingki sa West Philippine Sea bangud sa pagpang-harass sang China, kag ini nga isyu ang nagapanguna kag sentro gid sa amo nga landmark summit.
Sa summit nga natalana sa Abril 11, makaatubang ni Marcos sanday US President Joe Biden kag Japanese Prime Minister Fumio Kishida.
Si Kishida, ang una nga Japanese leader nga nagbyahe sa United States para sa isa ka state visit humalin kay former Prime Minister Shinzo Abe sang 2015, ang natalana nga magsugilanon kay Biden subong nga adlaw kag maga- address sa joint session sang US Congress bwas nga adlaw.
Sa bahin ni Presidente Marcos, nakapakigkita na ini sadto sa duha ka mga lideres sa iya official visits kag sa mga sidelines sang multilateral gatherings sadto.
