ILOILO CITY- Gin-athag sang Philipine Drug Enforcement Agency nga wala nila ginadakop, sa baylo, ila nga gina-rescue ang mga menor de edad nga natukiban nga involved sa iligal nga droga.
Ini may kaangtanan sa natabo sang damlag lang sang ginturn-over sang Barangay Officials sang North Baluarte, Molo, Iloilo City ang 14 anyos nga menor-de-edad sa Women and Children’s Protection Desk bangud nagpositibo ini sa drug test.
Sa interview sang Bombo Radyo kay Graziella Tanaleon, Public Information Officer sang Philippine Drug Enforcement Agency Region 6, iya ginpahayag nga indi menor-de-edad ang target sang ahensya apang kun may yara sang presensya sang bata sa isa ka drug den sa diin ginpatigayon ang raid, iga- turn over ini sa concerned agency partikular sa Department of Social Welfare and Development.
Suno kay Tanaleon, ginalikawan sang ahensya nga mangin subject sang operasyon ang menor-de-edad bangud ginaproteheran man sini ang welfare sang mga kabataan.
Pahayag niya, katungdanan sang mga ginikanan nga giyahan ang ila mga kabataan kag ipahangop sa mga ini ang epekto sang paggamit sang iligal nga droga.
Dugang niya, kun may yara man sang reports nga mabaton ang PDEA nga may menor-de-edad nga involve sa droga, ini ang ila nga gina-monitor kag ginahibalo kun sin-o ang source kag amo ina ang mangin subject sang operation.
Nagpahanumdom man ini sa publiko ilabi na sa ginikanan nga giyahan gid aang kabataan bangud nga mga modus sang mga durugista amo ang paggamit sa ila nga makipagtransaksyon sang iligal nga aktibidad.
