Tatlo ka mga kongresista ang ginapilian sang Partido Demokratiko Pilipino–Lakas ng Bayan (PDP-Laban) agud mangin kandidato sang partido sa House Speakership.
Sa interview sang Bombo Radyo Iloilo kay 3rd district board member kag Congressman-elect Lorenz Defensor, iya ginpahayag nga lakip sa ginapilian sang partido sanday anay House Speaker kag re-elected Davao del Norte Rep. Pantaleon Alvarez, Cong. Allan Velasco sang Marinduque kag CongDong Gonzales sang Pampanga.
Suno kay Defensor, magaagi pa sa maid-id nga proseso
antes makadesider ang partido kun sin-o ang mangin tiglawas sang partido para magpapili sa nasambit nga posisyon.
Samtang, naghatag man sang reaksyon si Cong-elect Defensor tuhoy sa pahayag ni Rep. Alvarez nga may yara sang baklanay sang boto sa kamara nga naga-involve sang 150 tubtob 300 million pesos nga kantidad kabaylo sang boto.
Suno kay Defensor, wala ini sang may nabaton nga ano man nga tanyag gikan sa sin-o man nga kongresista nga luyag magpungko bilang house speaker.
Samtang sa interview naman sang Bombo Radyo Iloilo kay Iloilo 3rd district Cong. kag Governor-elect Arthur Defensor Jr., iya ginpahayag nga kaangay nga imposible na ang vote-buying bangud sa masami, ang nagapapili nga house speaker ang wala sang kasumpong kag maathag na ang kadalag-an.
Suno naman kay Iloilo 4th district Cong. Ferj Biron, wala man ini naka-eksperyensiya nga gintuyo baklon ang iya boto para sa house speakership nga sang amo nga tion, si Alvarez man ang nagpapili kag nagdaug.
