Ginalauman nga sa masunod nga semana na madeklarar ang state of calamity sa Iloilo agud mahulag na ang calamity fund kag mas mapabaskog ang response batok sa nagatimbuok nga kaso sang dengue.
Sa interview sang Bombo Radyo kay Provincial Disaster Risk Reduction and Management Office (PDRRMO) head retired Colonel Cornelio Salinas, iya ginpahayag nga posible sa Lunes nila mapasa ang resolution sa Sangguniang Panlalawigan agud nga malakip ini sa ila agenda sa regular session sa Martes para sa approval kag official declaration.
Kaina sang naghimo sang resolusyon ang Provincial Disaster Risk Reduction and Management Council (PDRRMC) nga naga-rekomendar sang state of calamity matapos nga nalab-ot na sang Iloilo ang criteria sang National Disaster Risk Reduction and Management Council (NDRRMC) para sa deklarasyon sang amo nga status.
Una, may yara sang tuman ka taas nga incidence sang balatian sa isa ka specific period of time, kag ikaduha, duha ukon tatlo ka banwa ukon syudad ang apektado sang sini nga problema.
Sa bahin sang Iloilo, tatlo na ka local government units ang nakadeklarar sang state of calamity nga amo ang Passi City, Miagao, kag Tigbauan samtang ang banwa naman sang Badiangan ang nakadeklarar naman sang dengue outbreak.
Base sa data sang Provincial Health Office, may kabug-usan nga 4,595 cases sa probinsya as of August 10, 2024 kun sa diin 10 na ang mga napatay.
41 naman sa 43 ka LGUs magluwas sa Banate kag Tubungan ang nakalapaw na sa epidemic threshold ukon ang level of occurrence sang balatian nga nagakinahanglan sang urgent response.
36 naman ka mga banwa ang naka-rekord sang clustering sang dengue cases sa barangay.#
(with reports from Balita Halin sa Kapitolyo)
