ILOILO CITY-Gintumod sang mga opisyal sang probinsya ang pila ka mga problema nga dapat hatagan gilayon sang solusyon bilang pagpanghanda sa masunod nga mga kalamidad nga mahimo mag-igo sa Iloilo.
Sa ginpatigayon nga labing una nga sesyon sang Sangguniang Panlalawigan subong nga 2020, gin-isa-isa ni Iloilo 4th district Board Member Rolly Distura,chairman sang Committee on Disaster Risk Reduction and Management, ang mga butang nga dapat bag-uhon kag paayuhon pa.
Suno kay Distura,ini ginalakipan sang Comprehensive Land Use Plan sa probinsya nga dapat i-review, linya sang komunikasyon nga dapat mangin konkreto kaangay sang paggamit sang handheld radio, kag involvement sang mga national government agencies nga may papel sa pagtalupangod sa sitwasyon sa tion sang kalamidad.
Wala naman napunggan ni Distura nga sukmaan si Dr. Jerry Bionat, pinuno sang Provincial Disaster Risk Reduction and Management Office sa nangin kakulangan sang iya talatapan kun ngaa naglab-ot sa 16 ka tawo ang casualty sa probinsya sa paglaslas sang bagyo Ursula.
