Gindala-pauli sang Creamline Cool Smashers ang ila ika-siyam na nga korona sa Premier Volleyball League (PVL) matapos ginpatilaw sang mapait nga kalutusan ang Akari Chargers sa 2024 PVL Reinforced Conference knockout final subong nga gab-i.
Gingamit sang Creamline ang ila malawig nga eksperyensya kag championship poise agud nga maasud-asud ang mga puntos, 25-15, 25-23, 25-17, nga amo ang naghatag sa Akari sang ila una kag isahanon nga kapierdehan subong nga conference.
Sa opening frame pa lang, ginsuguran na sang CCS ang atake paagi sa 7-0 run paagi sa MVP frontrunner nga si Bernadeth Pons kag veteran middle blocker nga si Bea de Leon.
Pang-winningest team sa PVL history nga pwersa ang ginpakita sang CCS apisar nga wala ang ila key players nga sanday Tots Carlos, Jema Galanza, kag Alyssa Valdez.
Ini ang ila una nga Reinforced Conference title halin sang 2018. Sa nagligad nga duha ka Reinforced tilts, nagpangatlo lamang ang team sang 2022 kag first runner-up sang 2019 edition.
Sa pihak nga bahin, ang katapusan naman nga sweep nga nahimo sa finals game ang natabo man sa Creamline batok sa KingWhale Taipei sa 2022 Invitational Conference.
Nahibaluan nga antes ang finals, perpekto ang rekord sang Akari, 10-0, apisar nga nangin kontrobersyal ang semifinal win sini batok sa PLDT.
Ini nga one-game championship showdown ang orihinal kuntani nga gin-schedule sang Lunes, Septyembre 2, apang ginsaylo subong nga Myerkules bangud sa Bagyo Enteng.#
