Ginpahayag sang Philippine Health Insurance Corporation (PhilHealth) nga indi matuod ang mga balita nga ubos na ang ila pondo kag sila ginakabig nga bankrupt.
Suno kay PhilHealth President kag Chief Executive Officer Edwin Mercado, sang siya nagtambong sa pagpamati sang House Committee on Health, padayon pa nga mabakod ang pondo sang ahensiya bangud sang mga ipon halin pa sang nagligad nga tuig. Ginpabutyag man niya nga may mga tikang na sila nga ginahimo agud mapataas pa ang koleksyon sang ahensiya.
Apang ginpangayo man sang PhilHealth ang dugang nga subsidy halin sa mga mamalidha bangud sang paglapad sang coverage sang mga benepisyo.
Lakip sa ginadugangan nga serbisyo amo ang pagbulong sang cardiovascular diseases, dialysis, kidney operations kag iban pa nga mga critical nga bulong.
Ginpahayag man sang ahensiya nga nagapangayo pa sila sang P21 bilyon nga pondo halin sa Philippine Amusement and Gaming Corporation (PAGCOR) kag Philippine Charity Sweepstakes Office (PCSO) agud masiguro ang padayon nga serbisyo sa publiko.
