ILOILO CITY- Gin-athag sang Philippine Army nga napaidalom na sa restrictive custody si Staff Sergeant Jeffrey Barrios, ang isa sa duha ka mag-utod nga Barrios antes pa man sila nga ginserbehan sang search warrant kag nakuhaan sang mga armas kag granada sa ila balay sa Passi City matapos gintudlo sila nga suspek sa strafing incident sa San Enrique,Iloilo.
Sa interview sang Bombo Radyo kay Lt. Col. J-Jay Javines, Chief sang Division Public Affairs Office sang 3rd Infantry Division sang Philippine Army, iya ginpahayag nga epektibo ang restrictive custody sang Agusto 4 paagi sa iya commander sa 1st Platoon sang Six Cavalry sang 301st Brigade.
Suno kay Javines, bangud wala sang may nag-file sang formal complaint, nag-initiate sang kaugalingon nga imbestigasyon ang unit kun sa diin napaidalom si Barrios.
Base naman sa background check, si Barrios ang may mga utod nga involved man sa mga iligal nga aktibidad kag napreso apang wala pa nakumpirma kun matuod ini kun indi.
Sa subong, nagahulat man sila sa pag-execute sang counter affidavit sang kampo ni Barrios sa gin-alegar sang pamilya nga planted ang mga ebidensya nga narekober sa ila sang ginserbehan sang search warrant sa ila balay sa Agtabo, Passi City.
Sa amo nga operasyon, naaresto si Neptalie Barrios, samtang wala naman si Jeffrey sa amo nga balay.
