PRESIDENT ROXAS, CAPIZ– Dako nga kadalag-an para sa Philippine Army ang pagkarekober sang mga kagamitan kag importante nga mga dokumento sang New Peoples Army (NPA) matapos ang nagluntad nga engkwentro sa Brgy. Bayuyan, President Roxas, Capiz.
Sa interview sang Bombo Radyo kay Captain Cenon Pancito III, tagpamaba kag Division Public Affairs Office (DPAO) head sang 3rd Infantry Division sang Philippine Army, iya ginpahayag nga dako nga bagay ang pagkarekober sang mga kagamitan bangud natigayun nga napunggan ang ano man ang ginaplano nga himuon sang mga rebelde sa komunidad.
Suno kay Pancito, kapin sa 15 ka mga katapo sang rebelde nga grupo ang naka-engkwentro sang 61st Infantry Battallion sang Philippine Army sa diin nagdugay sang halos 20 minutos ang pagbayluhanay sang luthang.
Nangin dako man nga bulig suno kay Pancito ang kooperasyon kag paghatag sang impormasyon sang mga pumuluyo sa tion nga may makita sila nga mga rebelde.
Dugang pa ni Pancito, nangin malinong ang probinsya sang Capiz sa sulod sang pila ka tuig bangud sa paghina sang pwersa sang mga rebelde apang sa subong nagapabaskog naman sila sang ila grupo.
Nagapadayun naman suno kay Pancito ang panawagan sang militar sa mga katapo sang rebelde nga grupo nga luyag magbalik sa sabak sang gobyerno pinaagi sa Enhanced Comprehensive Local Integration Program (E-CLIP) sa diin may yara sang ginahatag nga benepisyo ang gobyerno.
Nahibaluan nga nakuha sang 61st IB sa encounter site ang isa ka portable generator, isa ka multi media projector, duha ka hand grenades, isa ka anti personal mine, walo ka mga rifle grenades, apat ka backpacks, duha ka cellphones, isa ka container sang gasolina, duha ka sako nga bugas, importante nga mga dokumento kag iban nga personal nga gamit sang ginapahayag miyembro sang Sangay sa Partido Platoon (SPP) East Komiteng Rehiyon Panay sang CPP-NPA.
