ILOILO CITY- Ginapreparahan na sang Philippine Army ang nagahilapit nga ika-55 nga anibersaryo sang Communist Party of the Philippines sa palaabuton nga Disyembre 26.
Sa interview sang Bombo Radyo kay Lt Col J-Jay Javines, Chief sang Division Public Affairs Office sang 3rd Infantry Division sang Philippine Army, iya ginpahayag nga padayon ang pag- conduct sang hot pursuit kag clearing operation sang mga katapo sang militar sa mga areas nga ginluntaran sang encounter sang damlag lang.
Halimbawa diri ang natabo sa Brgy. Jayubo, Lambunao kun sa diin may napatay nga isa ka katapo sang Communist Terrorist Group kag amo man sa Brgy. Manaripay, Calinog apang wala sang narecord nga casualty.
Suno kay Lt Col. Javines, padayunon nila ang combat operations sa mga frequented areas ukon areas nga may presensya sang mga New People’s Army.
Sa record sang 3rd Infantry Division sang Philippine Army, masami nga masiplatan ang mga katapo sang Communist Terrorist Group- Komiteng Rehiyon Panay Southern Front sa banwa sang Alimodian kag Igbaras sa Iloilo kag San Remigio sa Antique samtang ang Central Front naman ang may presensya sa mga banwa sang Janiuay kag Lambunao sa Iloilo kag Tapaz sa Capiz.
Kadungan sang ila nga anibersaryo, ginapaabot na sang militar ang pagpasabwag sang kalakasan kaangay sang pagsunog sang farm machineries, construction equipment kag gina- target man ang mga isolated detachments kag mga military convoy.
Dugang pa ni Lt. Col. J-jay Javines, sige-sige ang ila nga paghatag sang community support kag pagpatuman sang mga programa nga makapaayo sa komunidad kag agud man nga indi makapalapit kag makapang- recruit pa ang mga katapo sang rebelde.
