Nagpaandam ang Philippine Dermatological Society sa publiko batok sa paggamit sang injectable lightening agents pareho sang glutathione.
Sa interview sang Bombo Radyo kay Dr. Henedina Belicena, fellow sa Philippine Dermatological Society, iya ginpahayag nga sa Pilipinas, tuman ka makaalarma nga madamo sa gihapon nga mga Pilipino nga luyag magpaputi sang panit ang nagapadulong gihapon sa mga beauty salons ukon mga spas para nga magpa-inject sang amo nga whitening agent.
Suno kay Dr. Belicena, mangin ang Food and Drug Administration ang nagpaandam man kag gin-athag nga tubtob subong, wala sang ano man nga clinical trials nga nag-evaluate sang paggamit sang injectable gluthathione para magputi ang supat.
Una na ginpahayag sang FDA nga wala pa sang ano man nga guidelines sa paggamit sang injectable products para sa pagpaputi sang panit.
ANO ANG GLUTHATHIONE?
Suno kay Dr. Belicena, ang gluthathione isa ka substance nga nahimo halin sa amino acids glycine, cysteine, kag glutamic acid.
Ini ang gina- produce sang atay kag ginatungdan ang madamo nga papel sa mga proseso sa lawas kaangay sang tissue building kag repair, paghimo sang chemicals kag proteins nga ginakinahanglan sa lawas, kag sa function sang immune system.
Ang gluthathione may yara sang pila ka klase kaangay sang capsule nga nagaserbe bilang antioxidant ukon food supplement, kag may intravenous gluthathione nga makabig naman nga drug.
Ang injectable ukon intravenous glutathione nga aprubado sang FDA Philippines amo ang para lamang sa pagbulig sa pagbulong sa cisplatin chemotherapy.
ANO ANG CISPLATIN CHEMOTHERAPY?
Suno sa Cancer Research UK, ang cisplatin chemotherapy amo ang pagbulong sa advanced cancer sang bladder, ovaries, ukon testicles.
Ang cisplatin isa ka antineoplastic agent (cancer medicine) nga naga- interfere sa pagtubo sang cancer cells, nga sa proseso, ginaguba sang lawas.
Ang paggamit sini nga bulong ang ginahatag lamang ukon paagi sa idalom sang direct supervision sang isa ka doctor.
PELIGRO SANG INJECTABLE GLUTHATHIONE
Ginpahayag ni Dr. Belicena nga mangin sa Iloilo kag sa Western Visayas, madamo sang mga beauty salons, wellness spa, kag beauty clinics ang nagatanyag sang injectable gluthathione.
Suno kay Belicena, makaalarma ini bangud madamo sa gihapon ang wala masanagan kag maedukar natuhoy sa peligro nga dala sini sa tawo.
Ginpaathag ni Belicena nga ang drug nga gina-inject ang nagadiretso sa dugo kag magalatay sa mga organs sa lawas kag posible nga mahalitan ang atay, bato kag ang nervous system kun may tsansa nga ang epekto sini ang irreversible ukon indi na mabalik.
Sa pagkamatuod suno sa iya, ang pagputi sang isa ka tawo matapos nga nagpatublok ini sang gluthathione ang makabig nga side effect.
Dugang niya, kun indi man matinlo kag ideal ang set-up sang isa ka spa ukon beauty clinic, mahimo nga ma-contaminate ang syringe kag magdulot sang infection sa tawo nga nagpa-inject kaangay sang transmission sang infectious agents pareho sang hepatitis C and B, kag HIV kag iban nga mga komplikasyon.
Nahibaluan nga nagpaandam man ang FDA nga may salabton sa layi ang sin-o man nga responsable kun ang pasyente magsuprir sang komplikasyon ukon bawian gid sang kabuhi.
Mahimo nga mangatubang ini sang administrative sanctions kag pagkapreso ukon multa nga minimum nga P10,000 tubtob P100,000.
Base sa naman sa data sang FDA, humalin sang 2019, yara na sa kapin P20 million nga glutathione products ang nakumpiska sang ahensya.
PANUGYAN SA PUBLIKO
Gin-highlight ni Dr. Belicena nga may natural nga pamaagi sang pagpaputi sang panit.
Ini ang ginalakipan sang pagkaon sang prutas kag utan nga natural nga sources sang gluthathione kaangay sang abokado, okra, legumes, broccoli, kag alugbate.
Apang kinahanglan nga balansehon ini kag indi pagpatam-an.
Suno kay Belicena, importante gid nga parte sang lawas ang panit gani dapat nga halungan ini.
Apang, mas maayo, suno sa doktor, nga mareyalisar nga ang kaputi sang panit indi talaksan sang katahum sang isa ka tawo.
Pahayag niya, ang katahum nagadepende sa kun paano ginabaton sang tawo ang iya kaugalingon, ano man ang duag sang iya panit.
