ILOILO CITY- Nag-deploy sang warship ang Philippine Navy sa Escoda Shoal ukon Sabina Shoal sa tunga sang ginasuspetsahan nga reclamation activities sang China sa area.
Suno kay Commodore Roy Vincent Trinidad, Navy spokesperson for the West Philippine Sea, ini agud masiguro nga kun sin-o man ang nagatampok sang patay nga mga corals sa Sabina Shoal, masapubliko ini nga mga aktibidad.
Pahayag ni Trinidad, sa subong, wala pa sang reclamation activities nga na-monitor sa area sa nagligad nga pila ka adlaw.
Dugang niya, sigurohon sang Philippine Navy nga wala sang ano man nga reclamation activity nga himuon sang foreign vessels sa sulod sang soberanya sang Pilipinas.
Ang Escoda Shoal nahamtang 75 nautical miles ukon malapit 120 kilometers halin sa mainland Palawan.
Matandaan nga ginpahayag sang Philippine Coast Guard nga nakadiskubre sila sang ginpudpod nga corals nga gin-alegar nga gintampok sang Chinese ships sa Escoda Shoal.
Ini ang hugot naman nga ginpanginwala sang Beijing.
