ILOILO CITY- Wala nalikawan ang mga problema kadungan sang una nga adlaw sang border control sa Iloilo City matapos ginpaidalom sa Modified Enhanced Community Quarantine Status ang syudad.
Sa interview sang Bombo Radyo kay PMajor Jose Mark Anthony Gesulga, hepe sang Mandurriao Police Station kag nagapamuno sang quarantine control point sa Hibao-an Terminal sa Mandurriao, iya ginpahayag nga may mga indibidwal halin sa area sang Alimodian, Leon kag San Miguel nga luyag magsulod sa syudad apang wala man sang mahatag nga valid nga rason.
Suno kay Gesulga, may yara man sang mga tawo nga nagasiling nga essential ang ila trabaho kag rason sang pagpadulong sa syudad apang wala naman sang may mapakita nga identification card.
Sa bahin sang quarantine control point sa Brgy. Mohon, Arevalo, naeksperyensiyahan man ang tuman ka lawig nga trapiko nga naglab-ot pa sa Batiano Bridge sa Oton, Iloilo.
Sa interview sang Bombo Radyo kay PLt Raffy Señeres, Deputy Chief of Police sang Zarraga Municipal Police Station nga nag-augment sa quarantine control point sa Arevalo, iya ginpahayag nga may iban nga mga pasahero sang mga public utility vehicles nga naglakat na lang bangud sa sitwasyon sang trapiko.
Suno kay Señeres, tuman ka istrikto ang ila pag-screen sa mga tawo nga nagasulod sa border rason nga madugay antes pahanugutan nga makalabay ang mga salakyan sa diin ginaisa- isa gid ang mga pasahero.
Sa bahin naman sang quarantine control point sa Ungka, Jaro, ginpahayag ni PCapt. Eduardo Siacon Jr., hepe sang Jaro Police Station, iya ginpahayag nga isa ka common nga scenario sa checkpoints amo nga may mga motorista nga nagasulod sa syudad nga nagasiling nga may yara sila sang ginadul-ong ukon may ginasugat nga frontliner.
Suno kay Siacon, mabudlay ang pagtumod kon nagasugid sang matuod ang motorista apang ginapangayuan nalang nila sang valid nga identification card kag ginahingyo nga magbalik gilayon pagkatapos nila nga magdul-ong sang frontliners ukon sa sin-o man nga nagatrabaho sa essential sectors.
