Magapatigayon ang India kag ang Pilipinas sang maritime partnership exercise subong nga semana.
Pasado 8:00 kahapon sang aga sang nag-abot sa pungsod ang tatlo ka Indian naval ships nga amo ang guided missile destroyer INS Delhi, ang anti-submarine warfare corvette nga INS Kiltan, kag ang fleet tanker nga INS Shakti nga kabahin sang Indian Navy Eastern Fleet.
Sila ang gin-abi-abi sang mga tiglawas sang Philippine Navy kag Embassy of India.
Magatinir sila sa Pilipinas sa masunod nga apat ka adlaw para sa exercise nga natalana nga magpadalom pa sa relasyon sang duha ka pungsod.
“The Indian naval ships are visiting friendly foreign countries to share our experiences and best practices with host nation navies. We look forward to engaging interactions during our stay at Manila,” suno kay Rear Admiral Rajesh Dhankar.
“The two nations share common interests, particularly in maintaining peace and order in the Indo-Pacific region. The Indian Navy and the Philippine Navy share strong bonds of friendship, and both have endeavored to participate in maritime partnership exercises at every available opportunity.”
Nahibaluan nga isa ang India sa may pinakadaku nga pwersa militar nga may 1.5 million active personnel base sa data sang Central intelligence Agency (CIA) sang United States: 1.25 million sa army, 65,000 sa navy, 140,000 sa air force, kag 12,000 sa coast guard.
Ang Pilipinas naman ang bag-o lang nakatapos sa pag-host sang Balikatan joint military exercises kaupod sa United States sang nagligad nga bulan kun sa diin ang participants ang nagalakip sang tropa sang Australian Defense Force kag Marine Nationale ukon ang French Navy.
Magluwas diri, ang naval kag air forces sang Pilipinas, United States, Japan, kag Australia ang nagpatigayon man sang multilateral maritime cooperative activity (MMCA) sa West Philippine Sea sang nagligad nga bulan bilang parte sang commitment agud nga mapabaskog pa ang regional kag international cooperation.#
