Ginsapubliko ni Philippine Ambassador to the United States Jose Manuel Romualdez nga may yara sang ‘open discussions’ sa posible pagbakal sang Pilipinas sang F-16 fighter jets halin sa Estados Unidos sang Amerika.
Suno kay Romualdez, pananglitan madayon ang procurement, daku ini nga bulig sa kapasidad sang air defense sang pungsod.
Madugay na ini nga ginahulat sang Philippine Air Force (PAF) suno sa envoy apang wala man sini gindetalye ang timeline kag kun san-o maabot ang jets.
Una na nga ginpahayag sang security officials nga ginatinguhaan sang Pilipinas nga mapasangkad pa ang defense capability sini, ginahimo nga moderno ang armadong kusog, kag gina-establisar ang mas masangkad nga presensya sa exclusive economic zone sini ilabi na sa West Philippine Sea kun sa diin sunod-sunod ang pagpang-harass nga ginahimo sang China.
Ang F-16 fighter jet amo ang ginakabig nga most versatile aircraft sa United States Air Force nga mahimo makabato sa air-to-air fighting, ground attacks, kag electronic warfare.
