Ginsulod na sang militar sang Israel ang Nasser Hospital, ang pinakadaku nga nagagana pa nga ospital sa Gaza matapos ang apat ka bulan nga gyera.
Mismo ang statement ni Israel Defense Forces spokesperson Daniel Hagari ang nagkumpirma sa ila nga operasyon kun sa diin suno sa iya, may yara sila sang nabaton nga intelligence report nga may mga hostages nga gina-uyatan ang Hamas sa sulod sang amo nga ospital sa Khan Yunis.
Ginpahayag man nga lawas na lang sang iban nga hostages ang yara ginpangtago sa amo nga pasilidad.
Suno naman sa mga doktor kag medical officials sa amo nga ospital, ginpangluthang-patay sang Israeli snipers ang pila ka mga tawo samtang nagakaran-karan ang mga ini nga magpalagyo.
Tuman ka gamo kag makamamatay ang sitwasyon base sa footages.
Mangin ang direktor sang ospital ang nagsiling nga nagapila na lang sa wards ang mga pasyente nga may kritikal nga mga samad kag kinahanglan na subong ang bulig sang United Nations kag Red Cross agud maluwas ini nga mga pasyente kag ang mga staff.
Makit-an man kun paano nagadali-dali ang medical staff nga makadalagan samtang dala ang stretchers sang mga pasyente sa tunga sang corridor nga puno sang yab-ok kag guba na ang mga kisame.
Mangin ang mass graves sa sulod sang compound sang ospital ang ginpangkutkot man gamit ang military bulldozers sang Israel.
Suno naman kay Ashraf Al Qedra, spokesperson sang Hamas-run Gaza Ministry of Health, nagsulod ang IDF forces sa Nasser medical complex kag ginhimo ini nga “military barracks”.
“The occupation targets the ambulance headquarters and the tents of the displaced, and bulldozes the mass graves inside the Nasser Medical Complex,” pahayag sini sa isa ka statement online.
Nagpanawagan naman ang humanitarian organization nga Doctors Without Borders nga untaton na sang Israel ang operasyon sa ospital bangud ginabutang sini sa risgo ang sitwasyon sang staff kag mga pasyente nga yara sa sulod sang pasilidad.##
[File: Stringer/AFP]
