Gin-ulan sang palamangkutanon ang Iloilo Provincial Engineer’s Office bangud sa tuyo nga pagpatuman sang 23 ka mga water system para sa probinsya sang Iloilo.
Sa ginpatigayon nga session sang Sanguniang Panlalawigan, ginpisa-pisa ni 4th District Board Member Dominggo Oso Jr. si Engr. Rene Margarico nga amo ang naka-assign sa nasambit nga proyekto.
Suno kay Oso, nga-a subong lang ipatuman ang pagpatukod sang 23 ka water system nga napetsahan pa sang nagligad nga tuig.// Ginpahayag ni Oso nga bangud nga may yara sang election ban, ginadumili-an ang pagpatuman sang bisan ano nga proyekto nga mahimo malamuran sang pulitika.
Magluwas diri, ginpahayag man sang opisyal nga kwestyonable man ang pag-certify sa nasambit nga proyekto bilang ‘urgent’ bangud nga sang 2018 pa ini dapat nga ipatuman.
Kun napatuman lang gilayon suno kay Oso, kun tani napuslan pa sang mga pumuluyo ang water systems ilabi na subong nga may yara sang El Niño.
Sa pagpaathag naman ni Engr. Margarico, naatrasar ang pagpatuman sang nasambit nga proyekto bangud nga na-delay man ang pagtukod sang division nga iya ginapamunu-an sa idalom sang Iloilo Provincial Engineer’s Office kag kulang man ang personnel agud nga magpatuman sang proyekto.
Bangud sini, lubos ang pagpangayo sang pasaylo ni Margarico bangud sa pagkaatrasar sang nasambit nga proyekto.
