ILOILO – Dako ang posibilidad nga mapatuman man sa Western Visayas ang ginaduso sang pila ka mga transport groups sa Land Transportation Franchising and Regulatory Board nga pasakaan ang plete sa Public Utility Jeepneys sang 1 peso tubtob 3 pesos.
Una na nga ginpahayag sang ahensya nga gina-review na nila ang proposal sang transport groups nga mangin P15 ang minimum fare sa traditional jeepneys.
Sa interview sang Bombo Radyo kay Mr. Raymundo Parcon, Presidente sang Western Visayas Transport Cooperative, iya ginpahayag nga wala sila naghimo sang petition bangud manageable pa ang presyo sang gatong sa rehiyon.
Suno kay Parcon, may mga himata man sila nga pasahero sang jeep kag mini bus rason nga indi man nila luyag nga maapektuhan ang mga ini.
Apang bangud national ang pag-file sang petition sang iban nga grupo pahayag niya, posible magataas man ang plete sa Western Visayas bangud bilog nga Pilipinas ang sakop sang fare hike.
Dugang sang natungdan, ang luyag gid kuntani sang mga transport groups amo nga mapanubo ukon makakas ang buwis sa gatong agud indi na kinahanglan pa nga magpataas sang plete bangud maganubo na ang presyo sang gatong.
Ginasiguro naman sang LTFRB nga magapatigayon anay sila sang public hearings kag consultations agud mangin transparent kag malakip ang tanan nga sector sa decision-making process.
Nahibaluan nga ang minimum fare sa traditional jeepneys ang yara sa P13 nga gin-implementar sang Oktubre 2023 samtang P15 naman ang minimum fare sa modern jeepneys.
