Wala ginapanugyan ni Philippine National Police (PNP) chief Police General Debold Sinas ang pagkuha sang picture ukon video sa tion nga may krimen kaangay na lang sang natabo nga pagluthang patay sa mag-iloy sa Paniqui, Tarlac.
Ang mga biktima amo sanday Sonya Gregorio, 52 nga amo ang iloy kag anak sini nga si Frank Anthony Gregorio, 25, residente sang Barangay Cabayaoasan, Paniqui, Tarlac.
Samtang ang nangluthang naman nga pulis amo si Police Senior Master Sgt. Jonel Nuezca, naka-destino sa Parañaque City Crime laboratory unit kag kasilingan lang sang mga biktima.
Matandaan nga nag-viral ang video sang mga biktima kaupod ang suspek kag ang iya anak samtang nagabaisay tubtub ginpatay sang pulis ang mag-iloy.
Suno kay Sinas, mahimo mabutang sa peligro ang mga witness kun magkuha ang mga ini sang video kag pictures.
“I think nasa mga tao po ‘yun, sa mga witness na kumuha (ng video and photos). I will not advise because very tricky ‘yun. Baka mamaya kumuha ka ng video tapos baka mababalingan ka, so sa inyo po ‘yun,” pahayag ni Sinas.
“If I may suggest, kung may mga ganoong incident, we just witness at saka ‘wag na tayo mag-interfere lalo na pag armed or dangerous ‘yung suspect or ‘yung mga involved,” dugang pa sang PNP Chief.
Ginpahayag ni Sinas nga kun luyag sang mga sibilyan nga magkuha sang pictures ukon videos, nagakadapat nga layo ang mga ini sa crime scene.
Ginpanugyanan man sang PNP Chief ang publiko nga likawan ang pag-post sang video ukon pictures sa social media sa baylo, ginpanugyan nga ihatag na lang ang mga ini sa otoridad.
“Instead of having it posted sa internet, baka makuwan pa, matamper pa. Show it officially to the investigators at magtestify ka na ikaw ang kumuha.”
Gin-athag man ni Sinas nga isolated case lang ang natabo.
Matandaan nga nagsungka na si Nuezca sa Rosales Municipal Police Station matapos ang krimen.
Ginturn-over man niya ang 9mm Beretta pistol nga amo ang gingamit sa pagpatay sa mag-iloy.
Magluwas sini, ginsurrender man ni Nuezca, ang iya PNP ID kag 9 ka live ammunition.
May daan na nga hiligut-anon ang magkasilingan bangud sa right of way apang nahitso man ini sa ila barangay.
Sa subong, ginsaylo na sa Paniqui Municipal Police ang suspek kag ginpasakaan na sang kaso nga double murder.
