Ginapadalman na sang kapulisan kun paano nakaangkon sang bodyguards nga personnel sang Philippine Coast Guard si Guimaras gubernatorial candidate Margarita “Maggie” Cacho.
Si Cacho, nga pakaisa ni First Lady Atty. Liza Cacho Araneta Marcos, kaupod ang tatlo ka iban pa ang nadakpan sa entrapment operation sa Sibunag, Guimaras nga ginpatigayon sang Criminal Investigation Detection Group (CIDG)-Special Envoy on Transnational Crime kag Regional Intelligence Division.
Ini amo sanday Cayetano Leal, 48, residente sang Brgy. Misi, Lambunao nga tinawo ni Cacho; kag ang duha ka Philippine Coast Guard personnel nga sanday Marwin Parpan, 31, residente sang Dipolog City kag Rico Maylan, 27, residente sang Sandulot Siaton, Negros Oriental.
Ang duha ka mga Philippine Coast Guard personnel ang nabase sa Masbate apang nagaserbe nga personal security guard ni Cacho.
Sa interview sang Bombo Radyo kay Police Brigadier General Jack Wanky, director sang Police Regional Office 6, iya ginpahayag nga sa subong, wala pa nila mapat-ud kun may high ranking officer ukon opisyal ang duha ka uniformed personnel agud magserbe bodyguards.
Suno kay Wanky, nagpakig-angot man sila sa Commanding Officer sang duha apang wala ini nakahibalo kun paano sila nangin bodyguards ni Cacho.
.
Una na ginkumpirma sang regional director nga napasakaan na sang kaso nga swindling sanday Cacho kag Leal kag paglapas naman sa Republic Act 10591 ukon Comprehensive Firearms and Ammunition Regulation Act in relation with the COMELEC Resolution number 11067 (COMELEC Gun Ban) ang kaso sang duha ka mga uniformed personnel.
Suno kay Wanky, nag-ugat ang operasyon kasunod sang reklamo sang biktima nga ginpangayuan ini sang P1 million agud mapasulod ang proyekto sini para sa Private Motor Vehicle Inspection Center- Emission Testing Center sang Department of Transportation.
Ginagamit man ni Cacho ang first family bilang rason sa iya modus agud mapapati ang iya mga biktima.
Nakuha naman ang P400,000 nga boodle money nga gingamit sa operasyon.
May narekober man nga mga armas kag mga bala.
Sa subong, preso ang mga ini sa Sibunag Municipal Police Station.
Isa man sa ginaimbestigahan man sang otoridad kun may iban pa gid nga uniformed personnel nga nagaserbe bodyguards ni Cacho magluwas pa sa mga nadakpan.
