ILOILO CITY- Ginkumpirma sang Janiuay Municipal Police Station nga indi tawas kundi shabu gid ang narekober sa 16-anyos nga lalaki ng estudyante sa sulod sang campus sang Abangay National High School sa Janiuay, Iloilo.
Sa interview sang Bombo Radyo kay Police Captain Alwyn Salmon, hepe sang Janiuay Municipal Police Station, iya ginpahayag nga ini ang resulta nga naggwa sang ginpaidalom sa test ang unod sang sachet nga nakuha sa solterito.
Nahibaluan nga nakuha sa Grade 9 student ang iligal nga druga matapos ginrekisa sang iya manunudlo sang makabaton ini sang impormasyon nga may estudyante nga may dala nga kutsilyo pasulod sa eskwelahan kag didto na nakita ang isa ka sachet sa iya nga medyas.
Una na nanindugan ang estudyante nga tawas lang ang unod sang plastic sachet kag trip-trip lang suno sa iya ang ginhimo sini.
Nagnegatibo naman sa drug test ang estudyante kag ginturn-over sa Municipal Social Welfare and Development Office (CSWDO) apang ginbalik man ini sa iya pamilya.
