ILOILO CITY- Ginpasiguro sang Philippine National Police nga indi magtupa sa mga irresponsable nga kamot ang semi-automatic rifles matapos gintugutan na ang mga sibilyan nga makapanag- iya sini.
Matandaan nga gin-anunsyo sang Philippine National Police nga ang mga civilian gun owners ang posible na mag-angkon kag magrehistro sang 5.56mm kag 7.62mm-long firearms.
Sa interview sang Bombo Radyo kay Police Colonel Rex Buyucan,chief sang Regional Civil Security Unit 6, iya ginpahayag nga magaagi sa maid-id nga proseso antes makapanag- iya sini.
Base sa amendment sa Implementing Rules and Regulations sa Republic Act No. 10591 ukon ang Comprehensive Firearms and Ammunition Regulation Act, mahimo nga makaangkon sang pusil ang sibilyan sa kondisyon nga malab-ot niya ang kwalipikasyon nga amo ang masunod: kinahanglan nga Filipino Citizen, nagaedad sang 21 anyos pataas sa tion sang pag- apply diri, may yara sang trabaho,negosyo, ukon nag-file sang tax return para sa proweba sang iya income.
Magluwas diri,ang aplikante ang kinahanglan man nga magpasa sang mga requirements kaangay sang Court clearance nga magapamatuod nga indi ini convicted sa ano man nga krimen.
Gin-athag man ni Buyucan nga ang pag-angkon sang lisensya ang wala man nagakahulugan nga kinahanglan gilayon nga magbakal sang armas.
Suno sa iya, ang sin- o man nga luyag mag- rehistro kag magkuha sang lisensya ang subject sa regulasyon.
