Tuyo nga masabat sang Iloilo Provincial Government ang nagapadayon nga kakulangan sang classroom sa probinsya, paagi sa pagtun-over sang P125.320 Million nga pondo para sa programa kag proyekto nga iga-implementar sa bug-os nga Iloilo.
Sa interview sang Bombo Radyo, ginpahayag ni Iloilo Governor Arthur Defensor Jr. nga base sa ila assessment, yara sa 1,665 ka classrooms ang kulang sa bug-os nga probinsya.
Sa sini nga record, may yara sang 460 ka classrooms ang ginakabig nga prayoridad kag amo ang una nga pagatutukan sang provincial government.
Suno pa sa gobernador, ginpatigayon na ang maid-id nga pag-assess agud mahibaluan kun diin nga mga eskwelahan ang may pinaka daku nga kinahanglanon kag amo ini ang pagatagaan sang nasambit nga classrooms.
Ang nasambit nga pondo ang naghalin sa Special Education Fund (SEF) nga tinutuyo gid nga makahatag sang solusyon sa problema sa kakulangan sang classroom kag mapauswag ang kahimtangan sang edukasyon sa probinsya.
Dugang pa ni Defensor, ang pagpatindog sang mga classrooms ang iga-implementar sa hugot nga koordinasyon sa Department of Education (DepEd).
Sa karon nga termino kag sa palaabuton pa, nagpasalig ang gobernador nga tinguhaan sang probinsya nga makabaton sang P500 Million nga budget para sa classroom construction, agud nga masiguro nga ang tanan nga bulutuhan sa Iloilo ang may nagakaigo kag husto nga mga hulot para sa pagtuon sang mga kabataan.
