Gin-engganyo ni Pope Francis ang kaparian nga likawan ang pagbinahin-bahin ukon ang paghimo sang division para malab-ot ang paghidait kag mapabalik ang mga tumuluo sa Simbahan.
Kabahin ini sang iya nga homily sa Holy Thursday Mass sa St. Peter’s Basilica nga amo man ang adlaw sang pagdumdom sang Roman Catholic Church sa birth sang priesthood.
Sa amo nga homily, ginpaathag sang Santo Papa nga maga-distansya kag maga-duda ang tumuluo sa Simbahan kun makit-an nila nga puno ini sang indi-paghangpanay, pagbinasulay, kag pagbantayanay sa tunga sang kaparian.
Nagtipon ang Santo Papa kaupod sa mga cardinals kag obispo kag ang ginabanta 1,800 ka mga pari kag gin-renew ang vows nga ila ginhimo sang adlaw sang ila nga ordination.
Naghingyo man si Pope Francis sa ila nga likawan nga mangin Church bureaucrats nga nagahandum lamang sang promotions nga madamo sang benepisyo kag pribilehiyo.
“Let us help one another, brothers, to preserve harmony, starting not from others but each of us from himself. Let us ask ourselves: In my words, in my comments, in what I say and write, is there the seal of the Spirit or that of the world? Do I think about the kindness of the priest: if people see, in us too, people who are dissatisfied and discontented, who criticize and point fingers, where else will they find harmony?,” pahayag sang Santo Papa.
Nahibaluan nga ang adlaw sang Huwebes tubtub Domingo sa kada Semana Santa amo ang ginakabig most intensive period sa liturgical calendar sang Simbahan Katolika bangud ginadumdom sang mga Kristyano ang tion kun san-o gin-dakop si Hesus tubtub nga ginbanhaw ini gikan sa kamatayon.
Sunod man nga ginpakita ni Pope Francis ang pagkamapa-inubuson paagi sa paghugas kag paghalok sa tiil sang 12 ka mga preso sa isa ka juvenile facility sa guwa sang Roma.
Ini nga Casal del Marmo facility amo man ang juvenile prison nga ginkadtuan ni Pope Francis sang una sini nga ginhimo ang feet-washing ritual bilang isa na ka Santo Papa.
Kaangay man ini sa ginpakita ni Hesukristo sa iya mga apostoles sang gab-i antes ang iya nga kamatayon.
Subong nga Byernes Santo natalana nga magpanguna si Pope Francis sa duha ka Good Friday services kadungan sang adlaw nga ginadumdom sang mga Kristyano ang paglansang kay Hesus sa Krus.
Pangunahan man sini ang Easter vigil Mass sa Sabado sang gab-i kag ang “Urbi et Orbi” (ukon ang “To the City and the World”) blessing kag message sa St. Peter’s Square sa Easter Sunday. ##
