Ginpangunahan ni Pope Francis ang duha ka oras nga Easter Vigil Service Sabado sang gab-i oras sa Vatican kag pasado ‘las tres sa kaagahon (Domingo) oras naman diri sa Pilipinas.
Ginhimo ini sang 87-anyos nga Santo Papa isa ka adlaw matapos ang last-minute decision sini nga mag-atras sa pagpartisipar sa prusisyon sa Byernes Santo bangud sa iya ikaayong lawas.
Nagsulod ang Santo Papa sa St. Peter’s Basilica samtang sakay sa iya nga wheelchair kag naghalad sang pangamuyo para sa linibo ka mga tumuluo nga nagtambong.
Ini nga evening service ang isa sa pinaka-importante nga aktibidad sa liturgical calendar sang mga Katoliko nga naga-komemorar sang pagkabanhaw ni Hesus kag nagalakip man sa sacrament of baptism para sa walo ka adult converts.
Una na nga ginpahayag sang Vatican nga nag-atras ang Santo Papa sa pagpasakop sa Stations of the Cross (“Via Crucis”) ceremony agud nga masigurado ang ikaayong lawas sini kag makapanguna sa vigil kag sa Easter Sunday mass.
Matandaan nga wala man nagpartisipar si Pope Francis sa “Via Crucis” sang 2023 apang napahibalo ini sang abanse bangud na-ospital ini bangud sa bronchitis kag pila ka semana ang nagligad, nagpaidalom pa ini sa hernia operation.
Ang natabo sang nagligad nga Byernes Santo nga hinali nga pagkanselar sini sa iya nga partisipasyon sa prusisyon ang nagtuga man sa mga pamangkot sang publiko kun ano kadugay pa sini masarangan nga pamunuan ang Catholic Church kag ang 1.3 billion followers sini.#
